لاہو ر(سپورٹس رپورٹر)پاکستان کرکٹ بورڈ نے پری سیزن فٹنس اور فیلڈنگ کیمپ اور پاکستان شاہینز کے ٹریننگ کیمپ کی تفصیلات کا اعلان کر دیا  جو کراچی کے حنیف محمد ہائی پرفارمنس سینٹر میں لگایا جائیگا۔کیمپ میں 25کرکٹرز شرکت کریں گے اور یہ 24جون سے 7جولائی تک جاری رہے گا ۔ پچیس کھلاڑیوں کو مختصر کرکے پندرہ رکنی پاکستان شاہینز سکواڈ میں تبدیل کردیا جا گا جو 8سے 13 جولائی تک تربیتی کیمپ میں ڈارون آسٹریلیا کے دورے کی تیاری کریگا۔ پاکستان شاہینز 14جولائی سے 18اگست تک ڈارون کا دورہ کریگی۔ ڈارون میں پاکستان شاہینز بنگلہ دیش اے کیخلاف دو چار روزہ میچز کھیلے گی جبکہ 50اوورز کے دو میچز ناردن ٹیریٹری اور بنگلہ دیش اے کیخلاف کھیلے گی ۔نو ٹیموں کی ٹاپ اینڈ ٹی 20 سیریز میں بھی شرکت کریگی۔ پاکستان کے ریڈ بال ہیڈ کوچ جیسن گلیسپی 8 سے 13جولائی تک پاکستان شاہینز کے تربیتی کیمپ کی نگرانی کریں گے اور ٹیم کے ہیڈ کوچ کے طور پر ڈارون بھی جائیں گے۔ وہ29جولائی کو  بنگلہ دیش اے کیخلاف دوسرے چار روزہ میچ  کے بعد پاکستان واپس آجائیں گے یہاں انہیں بنگلہ دیش کیخلاف دو ٹیسٹ میچوں میں اپنی ذمہ داری سنبھالنی ہے۔