لاہور(سپورٹس رپورٹر) نوائے وقت کی 70 ویں سالگرہ پر کھیلوں کی تنظیموں اور کھلاڑیوں کی جانب سے مبارکباد ،مجید نظامی کی صحافتی خدمات کو خراج تحسین پیش کیا گیا۔ چیئرمین پاکستان کرکٹ بورڈ اعجاز بٹ نے کہا کہ مجید نظامی صحافتی میدان میں اپنے قلم کے ذریعے لوگوں کی رہنمائی کی ہے۔ پاکستان ہاکی فیڈریشن کے صدر قاسم ضیاءاورسیکرٹری آصف باجوہ نے کہا کہ مجید نظامی نے کشمیر اور بھارت کے معاملہ میں جو اصولی موقف اختیار کر رکھا ہے اس کی اور کوئی مثال نہیں ملتی۔ پاکستان فٹبال فیڈریشن کے صدر فیصل حیات اور سیکرٹری احمد یاد لودھی نے بھی نوائے وقت کی سالگرہ پر جناب مجید نظامی کو مبارکباد دی اور کہا کہ نوائے وقت ایک مشن کا نام ہے۔ پاکستان کرکٹ ٹیم کے سابق کپتان شعیب ملک، محمد یوسف، عبدالرزاق، عمران نذیر، سابق ہاکی کپتان محمد ثقلین، ذیشان اشرف، ریحان بٹ، ٹینس سٹار اعصام الحق نے کہا ہے کہ ملک میں کھیلوں کے فروغ کیلئے نوائے وقت نے مثبت کردار ادا کیا ہے جس پر مجید نظامی کو سلام پیش کرتے ہیں۔