سری لنکا کیخلاف ہوم سیریز : پاکستان بلائنڈ کرکٹ کونسل نے سلیکشن کمیٹی کا اعلان کر دیا

لاہور(سپورٹس رپورٹر+ نمائندہ سپورٹس) پاکستان بلائنڈ کرکٹ کونسل نے تین رکنی سلیکشن کمیٹی کا اعلان کر دیا ہے جو اگلے ماہ سری لنکا کے خلاف ہوم سیریز کے لیے قومی سکواڈ کا انتخاب کرئے گی۔ پاکستان بلائنڈ کرکٹ کونسل کے چیئرمین سید سلطان شاہ کے مطابق تین رکنی سلیکشن کمیٹی میں سابق کپتان عبدالرزاق، مہر محمد یوسف ہارون اور حبیب اﷲ خان شامل ہیں۔ پاکستان اور سری لنکا کی بلائنڈ ٹیموں کے درمیان تین ٹی ٹونٹی اور تین ایک روزہ میچوں کی سیریز کھیلی جائیگی جو 3 سے 10 اپریل 2016ء تک منعقد ہوگی۔ پاکستان بلائنڈ کرکٹ کونسل نے قومی ٹیم کے انتخاب کے لیے دو روزہ ٹرائل کے شیڈول جاری کر دیا ہے جس کے مطابق ٹرائلز 25 اور 26 مارچ کو کنٹری کلب مریدکے میں ہونگے۔