کراچی (کرائم رپورٹر) کراچی میں گزشتہ روز فائرنگ کے واقعات میں نیشنل لاجسٹک سیل کے اہلکار سمیت 2 افراد ہلاک اور شیر خوار بچے سمیت سات افراد زخمی ہوگئے۔ نیشنل لاجسٹک سیل کی سوزوکی ہائی روف پر بوٹ بیسن کے علاقے میں موٹر سائیکل سوار مسلح افراد نے فائرنگ کی۔جس کے نتیجے میں تین افراد 30 سال رویت خان‘ 45 سالہ عبدالستار اور 35 سالہ افتخار زخمی ہوئے اور ان میں سے ایک 30 سالہ روہت خان نے ہسپتال میں دم توڑ دیا۔ ادھر سچل کے علاقے میں صفورا چورنگی کے قریب نیو رضویہ سوسائٹی میں موٹر سائیکل سوار مسلح ملزمان کی فائرنگ سے کار میں سوار ایک شخص70 سالہ امیر علی ہلاک جبکہ 2 سالہ بچہ علی اصغر اور35 سالہ علی رضا زخمی ہوگئے۔ اس کے علاوہ سولجر بازار کے علاقے میں پھلی مارکیٹ کے قریب مسلح افراد نے مزاحمت پر فائرنگ کرکے دو افراد30 سالہ نوشاد علی اور40 سالہ رمضان زخمی کر دیا جبکہ منگھوپیر میں ہمدرد یونیورسٹی کے قریب ایک شخص42 سالہ لیاقت علی فائرنگ سے زخمی ہوگیا۔
کراچی/ فائرنگ