لاہور‘ اسلام آباد (نامہ نگار + نمائندہ خصوصی) سابق وزیراعظم ذوالفقار علی بھٹو کی اہلیہ، بیگم نصرت بھٹو کا آج 23 مارچ کو 93 واں یومِ ولادت ہے۔ بیگم نصرت بھٹو کے یوم پیدائش پر ملک بھر میں تقریبات منعقد کرنے کا اعلان سیکرٹری جنرل پیپلز پارٹی سید نیر حسین بخاری کے جاری کردہ بیان میں کہا گیا ہے کہ مادر جمہوریت بیگم نصرت بھٹو کے یوم پیدائش پر ملک بھر میں تقریبات منعقد کی جائیں۔ پاکستان پیپلز پارٹی کے چیئرمین بلاول بھٹو زرداری نے اپنے پیغام میں کہا کہ قوم کے بنیادی سیاسی حقوق کی خاطر اپنے ذاتی المناک صدمات کو بْھلا کر غیرمتزلزل عزم و استقلال کے ساتھ جد و جہد کرنے کا نام بیگم نصرت بھٹو ہے۔ بیگم نصرت بھٹو انتہائی بہادر اور باوقار شخصیت کی مالک خاتون تھیں۔ یہ منفرد اعزاز بھی انہیں قدرت نے دیا ہے کہ ایک طرف وہ ایک وزیراعظم کی بہو، پاکستان کے پہلے منتخب وزیراعظم کی اہلیہ اور اسلامی دنیا کی پہلی منتخب خاتون وزیراعظم کی والدہ ہیں۔