آکلینڈ(آئی این پی)نیوزی لینڈ ٹیم کے مایہ ناز اووپننگ بلے باز مارٹن گپٹل نے کہا ہے کہ انکی ٹیم شیڈول آئی سی سی ورلڈ کپ کرکٹ ٹورنامنٹ میں بھرپور انداز سے شرکت کرے گی۔ انہوں نے کہا کہ ٹیم عالمی ٹائٹل جیتنے کے لئے سردھڑ کی بازی لگا دے گی۔ نیوزی لینڈ نے چار برس قبل منعقدہ میگا ایونٹ میں مسلسل 8 میچز جیت کر پہلی بار فائنل میں پہنچنے کا اعزاز حاصل کیا تھا تاہم فیصلہ کن معرکے میں اسے آسٹریلیا کے ہاتھوں شکست کا سامنا کرنا پڑا تھا۔مارٹن گپٹل نے اپنے بیان میں کہا کہ ورلڈ کپ سکواڈ میں جگہ بنانا میرے لئے کسی بڑے اعزاز سے کم نہیں ہے۔ بحیثیت سینئر بلے باز میری کوشش ہو گی کہ عمدہ پرفارم کر کے ٹیم کو فتوحات دلانے میں کردار ادا کروں۔ میرے خیال میں کھلاڑی 2015 ورلڈ کپ فائنل کی شکست کو حوصلہ افزائی کے طور پر استعمال کرتے ہوئے رواں ماہ ہونے والے میگا ٹورنامنٹ میں بھرپور انداز سے حصہ لیں گے۔ ہماری ٹیم تجربہ کار کھلاڑیوں پر مشتمل ہے اور ہم عالمی ٹائٹل جیتنے کیلئے خوب جان لڑائیں گے۔