ظل سبحانی کے منہ کھولنے سے جعلی راجکماری کے لب پر تالے ہیں: فردوس عاشق

لاہور‘ گوجرانوالہ (نیوز رپورٹر + نوائے وقت رپورٹ + نمائندہ خصوصی) معاون خصوصی وزیراعلیٰ پنجاب برائے اطلاعات ڈاکٹر فردوس عاشق اعوان نے کہا ہے کہ ہماری پارٹی کی اصل جنگ مہنگائی، بیروزگاری اور کرونا سے ہے‘ پی ڈی ایم مردہ گھوڑا کرپٹ ٹولہ جو مرضی کر لے اس میں جان نہیں پڑ سکتی۔ شو باز شریف پتلی گلی سے بیرون ملک فرار ہونا چاہتے تھے لیکن ان کا ملک سے فرار ہونا وطن عزیز سے بڑی زیادتی ہوتی۔ ان خیالات کا اظہار انہوں نے گوجرانوالہ آمد کے موقع پر ضلع کونسل ہال میں صحافیوں کی ویکسی نیشن کیلئے الگ سے قائم کیے گئے کائونٹر کا افتتاح کرنے کے بعد میڈیا سے بات چیت کرتے ہوئے کیا۔ ان کا کہنا تھا ہماری حکومت ملک میں معاشی استحکام کے ایجنڈے پر کامیابی سے گامزن ہے۔ ان کا کہنا تھا کہ جہانگیر ترین کا مسئلہ حل ہو چکا ہے یہ گھر کا مسئلہ تھا گھر کے بڑوں نے مل بیٹھ کر حل کر دیا۔ علاوہ ازیں معاون خصوصی اطلاعات پنجاب ڈاکٹر فردوس عاشق اعوان نے کہا ہے کہ نواز شریف اگر خود کو برطانیہ میں غیر محفوظ سمجھتے ہیں تو پاکستان آجائیں۔ حکومت انہیں سکیورٹی کی مکمل گارنٹی دے گی۔ ہفتہ کو گورنر ہاؤس لاہور میں ریسکیو1122 کی تقریب کے بعد میڈیا سے گفتگو کرتے ہوئے فردوس عاشق اعوان نے کہا کہ نواز شریف برطانیہ علاج کی غرض سے گئے تھے نہ کہ بیٹوں کے کاروباری دفتر میں مال ٹھکانے لگانے۔ انہوں نے کہا کہ نواز شریف بتائیں کہ وہ بیٹوں کے دفتر میں کیا کر رہے تھے؟۔ دریں اثناء معاون خصوصی پنجاب فردوس عاشق اعوان نے کہا ہے کہ جب سے ظل سبحانی دوم نے منہ کھولا ہے جعلی راجکماری کے لب پر تالے لگ گئے ہیں۔ نواز شریف علاج نہیں بیٹے کا کاروبار دیکھنے لندن گئے ہیں۔ لینے دینے والے آپ کا پیچھا کر رہے ہیں۔ اس سے حکومت کا کوئی لینا دینا نہیں۔مزید برآںمعاون خصوصی وزیراعلیٰ پنجاب ڈاکٹر فردوس عاشق اعوان نے کہا وزیر اعلیٰ پنجاب کا سرکاری ملازموں کی تنخواہوں میں 25 فیصد اضافے کا فیصلہ سفید پوش طبقے کی مالی مشکلات کم کرے گا۔ وزیراعلیٰ پنجاب  نے جہانگیر خان ترین کے ساتھیوں کو  مسائل کے حل کی جو یقین دہانی کرائی ہے۔ ان خیالات کا اظہار معاون خصوصی نے گورنر ہاؤس میں تقریب کے بعد میڈیا سے گفتگو کرتے ہوئے کیا۔ ایک سوال کے جواب میں ڈاکٹر فردوس عاشق اعوان نے کہا شہباز شریف کو عدالتوں میں سوالات کا سامنا ہے اور باہر بھی نہیں جانے دیا گیا تو انہوں نے اپنے آپ کو مصروف رکھنے کے لیے کوئی نہ کوئی مصروفیت تو ڈھونڈنی ہے۔