لاہور(سپورٹس رپورٹر)اولمپئن جیولین تھرور ارشد ندیم کو تھرو کیلئے نئی جدید ترین جیولین مل گئیں، ان کے پاس اب کاربن فائبر کی 6مہنگی اور جدید جیولین ہیں۔ارشد ندیم کا کہنا ہے کہ مجھے نئی جیولین کا ضرور فائدہ ہو گا، تعاون کرنے پر سب کا شکریہ ادا کرتا ہوں، اگر میں اپنا بہترین کھیل پیش کرتا ہوں تو اولمپکس میں ضرور گولڈ میڈل ملے گا۔اولمپئن جیولین تھرور ارشد ندیم جنوبی افریقہ میں 5ہفتوں کی ٹریننگ کے بعد وطن واپس پہنچ چکے ہیں اور پنجاب سٹیڈیم میں انہوں نے ٹریننگ کا آغاز کر دیا ہے، وہ نئی جیولین کیساتھ ٹریننگ کر رہے ہیں۔ارشد ندیم کا کہنا ہے کہ وزیر اعظم شہباز شریف، پی ایس بی، پنجاب سپورٹس اور فیڈریشن کا مشکور ہوں، جنہوں نے ہر موقع پر تعاون کیا ہے اور مجھے سپورٹ کیا ہے۔