2 سو کلو میٹر دوری سے چاند کی تصویر لینا مشن ہے: ممبر آئی کیوب ڈاکٹر خرم 

کراچی (نوائے وقت رپورٹ) چاند پر پاکستان کے پہلے سیٹلائٹ مشن ’آئی کیوب قمر‘ کا سفرجاری ہے۔ ٹیم ممبر آئی کیوب کیو ڈاکٹر خرم خورشید نے بتایا کہ آئی کیوب کیو کامیابی سے اپنا سفر چاند کے گرد جاری رکھے ہوئے ہے۔ انہوں نے کہا کہ 9 ہزار کلو میٹر فاصلے سے چاند کی لی گئی تصاویر موصول ہورہی ہیں، یہ تصاویر فی الحال بہت فاصلے سے لی جارہی ہیں، ہمارا مشن ہے 200 کلو میٹر فاصلے سے چاند کی تصویر لی جائے۔ ڈاکٹر خرم خورشید کا کہنا تھا کہ چین کا سیٹلائٹ چینگ ای 6 جون کے پہلے ہفتے میں چاند کی سطح پر اترے گا جو کہ چاند کی مٹی اکٹھا کرے گا۔ انہوں نے مزید کہا کہ پاکستان کا سیٹلائٹ مشن 3 سے 6 ماہ تک چاند کے اطراف چکر لگائے گا۔