(ن) لیگ عوام کو ریلیف دے کر خوشحالی    واپس لائے گی: عارف سندھیلہ 

شیخوپورہ (نمائندہ نوائے وقت) مسلم لیگ (ن) کے ضلعی صدر و سابق رکن صوبائی اسمبلی محمد عارف خان سندھیلہ نے کہا ہے کہ (ن) لیگ عوام کو حقیقی معنوں میں ریلیف فراہم کر کے خوشحالی کا دور واپس لائے گی۔ میاں نواز شریف کی قیادت میں معاشی استحکام کی منزل حاصل کی جائے گی، پاکستان جلد ایشین ٹائیگر بنے گا، پاکستان کو ایٹمی قوت بنانے والے قوم کے ہر دلعزیز لیڈر میاں محمد نواز شریف قوم کو محرومیوں کی دلدل سے نکالیں گے۔ میڈیا سے گفتگو کرتے ہوئے محمد عارف خان سندھیلہ نے کہا کہ پارٹی قائد میاں محمد نواز شریف کے نظریہ کے فروغ اور ان کے انقلابی ویژن کی تکمیل کی ملکی پائیدار ترقی اور عوامی خوشحالی کی ضمانت ہے۔ پنجاب حکومت کی پالیسیاں عوام کی فلاح وبہبود کا ذریعہ ثابت ہو رہی ہیں۔ وزیر اعلیٰ پنجاب مریم نواز جس طرح میاں نواز شریف کے ویژن کو عملی جامہ پہنا رہی ہیں وہ اپنی مثال آپ ہے، ہم ان کی اس جاری جدوجہد میں ان کے شانہ بشانہ ہیں۔ ہماری اصل جنگ غربت و مہنگائی کے خلاف ہے جس میں فتح ان شاء اللہ (ن) لیگ کی ہو گی۔