دبئی (نوائے وقت رپورٹ) پاکستان کے محمد وسیم نے دبئی میں میکسیکو کے گانیگان لوپیز کو پروفیشنل باکسنگ مقابلے میں شکست دیدی۔ محمد وسیم آٹھ راؤنڈ میں حریف باکسر پر حاوی رہے۔ ریفریز نے متفقہ طور پر محمد وسیم کو فاتح قرار دیا۔ پاکستانی نژاد برطانوی باکسر عامر خان بھی اس موقع پر موجود تھے۔ یہ محمد وسیم کی پروفیشنل کیریئر کی دسویں کامیابی تھی۔ محمد وسیم نے ورلڈ رینکنگ فائٹ جیت کر سپر فلائی ویٹ ٹائٹل اپنے نام کیا۔ میچ میں پاکستانی باکسر کو 75 کے مقابلے میں 77 پوائنٹس سے کامیابی ملی۔پاکستانی باکسر محمد وسیم نے ویڈیو پیغام میں کہا ہے کہ پاکستان کا نام روشن کرنے پر خوش ہوں۔ کیریئر کی دسویں فائٹ جیت کر اچھا لگ رہا ہے۔ جیت پاکستانی بھائیوں کے نام کرتا ہوں۔ دریں اثناء باکسر عامر خان نے ورلڈ رینکنگ فائٹ جیتنے پر محمد وسیم کو مبارکباد دی ہے۔