فیصل آباد، ہارون آباد، چناب نگر میں حادثات، 2خواتین سمیت  7افراد جاں بحق

فیصل آباد + ہارون آباد + چناب نگر (نمائندہ خصوصی+ نامہ نگار) ٹریفک حادثات میں 7 افراد جاں بحق ہو گئے ہیں۔ موٹر وے ایم تھری پر سمندری کے قریب ڈرائیور کو نیند آ جانے کے باعث تیز رفتار مزدا ٹرک اپنے آگے جاتے ٹرالر سے ٹکرا گیا جس کے نتیجے میں ٹرک سوار ڈرائیور پینتیس سالہ ساجد سکنہ ہارون آباد اور اس کے ساتھی اٹھائیس سالہ عدنان اور بیس سالہ رضوان شدید زخمی ہو کر موقع پر ہی جاں بحق ہو گئے۔ ہارون آباد کے نواحی گاؤں 213کے قریب ایک بے قابو کار اچانک درخت سے ٹکرا گئی، جس کے نتیجے میں کار میں سوار ظفر ساؤنڈ سسٹم والا کی اہلیہ اور والد کی موت واقع ہو گئی جبکہ خود شدید زخمی ہے۔ چناب نگر میں شوگر ملز لالیاں کے قریب تیز رفتار مسافر کوچ کی ٹکر سے موٹر سائیکل پر سوار 65 سالہ عمر فاروق اور اس کی 55 سالہ بیوی نسیم اختر سکنہ فیصل آباد موقع پر ہی جاں بحق ہو گئے۔ ڈرائیور فرار ہو گیا۔ جاں بحق ہونے والی میاں بیوی کی نعشیں لالیاں ہسپتال پہنچا دی گئی ہیں۔