نواز شریف کی مری کے راستوں پر ڈرائیونگ‘ مریم بھی ساتھ تھیں

اسلام آباد (نیٹ نیوز) سابق وزیراعظم نواز شریف نے مری کے مضافات میںخود گاڑی ڈرائیور کی۔ مریم نواز شریف نے ٹوئٹر پر اپنا وطن‘ اپنا پیارا پاکستان کے عنوان سے ویڈیو شیئر کر دی۔ نواز شریف کے ساتھ مریم نواز شریف بھی گاڑی میں موجود تھیں۔ نواز شریف مریم نواز شریف کو سڑک کی چڑھائی کے بارے میں بتا رہے ہیں۔ نواز شریف ویڈیو میں بتا رہے ہیں کہ کلثوم نواز کی خالہ بھی یہاں آیا کرتی تھیں۔ یہ مری کا علاقہ کالی مٹی ہے۔ مریم نواز شریف نے جواب دیاکہ جی ہم بھی اس وقت ان کے گھر جایا کرتے تھے۔ نواز شریف نے کہاکہ میں اور کلثوم نواز مری سے چھانگلہ گلی پیدل آیا کرتے تھے۔ ہم یہ چڑھائی تیزی سے چڑھا کرتے تھے۔ مریم نواز شریف نے کہا کہ ہم پھر کھانا لیکر آتے تھے۔مری سے نامہ نگار خصوصی کے مطابق نواز شریف اسلام آباد ہائی کورٹ میں سزا کے خلاف اپیل کی پیر کے روز پیشی تک مری ہی میں قیام کریں گے۔ نواز شریف نے مری قیام کے دواران مسلم لیگ ن سمیت بعض دیگر اہم شخصیات سے ملاقاتیں کیں۔