لاہور (سپورٹس رپورٹر)قائداعظم ٹرافی کرکٹ ٹورنامنٹ کے پانچویںاورآخری راؤنڈ میںفیصل آباد‘ ایبٹ آباد‘ سیالکوٹ‘ بہاولپور اورپشاور نے کامیابی حاصل کرلی۔میرپور میں سیالکوٹ نے کراچی بلوز کو 8  وکٹوں سے ہرادیا۔سیالکوٹ کو جیتنے کیلئے 99 رنز کا ہدف ملا  جو دو وکٹوں پر حاصل کرلیا۔ کراچی بلوز دوسری اننگز میں 224 رنز بناکر آؤٹ ہوگئی۔ سیف اللہ بنگش 105  رنز بناکر ناٹ آؤٹ رہے۔محمد علی نے 5 جبکہ میچ میں9  وکٹیں حاصل کیں۔ اسلام آباد میں فیصل آباد نے اسلام آباد کو 247  رنز سے شکست دیدی۔اسلام آباد کو جیتنے کیلئے 396 رنز کا ہدف ملا لیکن ٹیم 148 رنز بناکر آؤٹ ہوگئی۔ شہزاد گل اور اسد رضا نے چار چار وکٹیں حاصل کیں۔ ایبٹ آباد میں بہاولپور نے کراچی وائٹس کو 198  رنز سے ہرادیا۔کراچی وائٹس کو جیتنے کیلئے 301رنز کا ہدف ملا لیکن 102 رنز بناسکی۔ مہران سانول نے 5 وکٹیں حاصل کیں۔ اسلام آباد میں ایبٹ آباد نے حیدرآباد کو 249 رنز سے ہرادیا۔حیدرآباد کو جیتنے کیلئے345 رنز کا ہدف ملا تاہم  ٹیم95 رنز پر آؤٹ ہوگئی۔ آفتاب احمد نے 5 وکٹیں حاصل کیں۔ایبٹ آباد کی ٹیم دوسری اننگز میں369 رنز بناکر آؤٹ ہوگئی۔راولپنڈی میں پشاور نے راولپنڈی کیخلاف 26 رنز سے کامیابی حاصل کی۔راولپنڈی کو میچ جیتنے کیلئے241 رنز کا ہدف ملا لیکن ٹیم 214رنز بناکر آؤٹ ہوگئی۔تینوں گروپ کے پوائنٹس ٹیبل پر سرفہرست ٹیموں نے سنگل لیگ کی بنیاد پر سہ فریقی مرحلے کیلئے کوالیفائی کرلیا جس کا آغاز 26 نومبر کو ہوگا۔ ٹیموں میں گروپ اے سے لاہور وائٹس‘ گروپ بی سے پشاور اور گروپ سی سے سیالکوٹ شامل ہیں۔