لاہور (خصوصی رپورٹر) پاکستان کی سابق خاتون اول، پیپلزپارٹی کی سابق چیئرپرسن اور سابق سینئر وفاقی وزیر بیگم نصرت بھٹو کی تیسری برسی آج جمعرات 23 اکتوبر کو منائی جائیگی۔ اس موقع پر سابق صدر پاکستان اور پیپلزپارٹی کے شریک چیئرمین آصف علی زرداری نے اپنے پیغام میں کہا ہے کہ بیگم صاحبہ ایک عظیم شخصیت تھیں جو بہادری کا مجسمہ تھیں۔ انہوں نے کہا کہ بیگم بھٹو مجسم وقار اور سخت ترین حالات کا بڑی دلیری اور حوصلے سے سامنا کیا۔ جمہوری جدوجہد میں انہوں نے ذاتی برداشت کا عملی نمونہ پیش کیا جو جمہوریت سے محبت کرنے والوں کیلئے مشعل راہ رہے گا۔آج انہیں خراج عقیدت پیش کرنے اور ان کی جدوجہد کو یاد کرنے کا بہترین طریقہ یہ ہے کہ جمہوری اداروں کو مضبوط کیا جائے اور جمہوری عمل کو روکنے کی ہر کوشش کے خلاف خبردار رہا جائے۔