لاہور‘ سادھوکے: ٹریفک حادثات‘ 2 بھائی‘ باپ بیٹی جاں بحق‘ 2 زخمی

لاہور+ سادھوکے (سٹاف رپورٹر+ نامہ نگار) لاہور اور سادھوکے میں ٹریفک حادثات میں 2 بھائی اور باپ‘ بیٹی جاں بحق اور 2 شدید زخمی ہو گئے۔ جنوبی چھائونی رنگ روڈ کے قریب تیز رفتا کار نے موٹر سائیکل سوار دو بھائیوں کو ٹکر مار دی جس سے احتشام موقع پر ہی دم توڑ گیا جبکہ دوسرے بھائی احسان اور کار سوار کو شدید زخمی حالت میں منتقل کیا گیا جہاں احسان بھی زخموں کی تاب نہ لاتے ہوئے دم توڑ گیا۔ حادثے میں ہلاک ہونے والے بھائیوں کا تعلق ملکوال سے ہے۔ گذشتہ روز غازی چک حافظ آباد کا 27 سالہ ایوب منظور نواحی گائوں راجہ میں اپنے والد کی برسی سے واپس گائوں جارہاتھا کہ جی ٹی روڈ پر اپنی دو بیٹیوں پانچ سالہ ثانیہ اور اڑھائی سالہ فجر فاطمہ سمیت عبور کرتے لاہور سے آنیوالے تیز رفتار ٹرک نے تینوں کو بُری طرح روند ڈالا، حادثہ کے نتیجہ میں ایوب اور اسکی بیٹی ثانیہ شدید زخموں کی تاب نہ لاتے ہوئے موقع پر ہی دم توڑ گئے جبکہ ساڑھے تین سالہ فجر فاطمہ کی ٹانگیں ٹوٹ گئیں،جسے تشویشناک حالت میں لاہور میوہسپتال ریفر کردیا گیا جہاں پر اُسکی حالت نازک بتائی جاتی ہے، صدر پولیس نے ٹرک ڈرائیور نوید عباس سکنہ دیربالا کوٹ آزاد کشمیر کو ٹرک سمیت گرفتار کرلیا۔