چنئی: آئی سی سی مینز کرکٹ ورلڈ کپ 2023 کے 22 ویں میچ میں پاکستان نے افغانستان کو جیت کیلئے 283 رنز کا ہدف دے دیا۔
بھارت کے شہر چنئی کے چدم برم سٹیڈیم میں ہونیوالے آئی سی سی ورلڈ کپ کے 22 ویں میچ میں پاکستان کے کپتان بابر اعظم نے افغانستان کیخلاف ٹاس جیت کر پہلے بیٹنگ کا فیصلہ کیا.پاکستان نے پہلے بیٹنگ کرتے ہوئے مقررہ 50 اوورز میں 7 وکٹوں کے نقصان پر282 رنز بنائے۔جارحانہ آغاز کے بعد قومی ٹیم کی 56 رنز کے مجموعی سکور پر پہلی وکٹ گر گئی، اوپنر بلے باز امام الحق 17 رنز بنا کر عظمت اللہ کی گیند پر پویلین لوٹ گئے جبکہ شاہینوں کو دوسرا نقصان عبداللہ شفیق کی صورت میں اٹھانا پڑا، وہ 75 گیندوں پر 58 رنز بنا کر آؤٹ ہوئے۔محمد رضوان بھی کوئی خاطر خواہ کارکردگی نہ دکھا سکے اور 8 رنز بنا کر نور احمد کی گیند پر چلتے بنے تاہم سعود شکیل بھی زیادہ دیر کریز پر نہ ٹھہر سکے اور 34 گیندوں پر 25 رنز بنا کر محمد نبی کا شکار ہو گئے۔پاکستان کی پانچویں وکٹ 206 کے مجموعی سکور پر گری جب کپتان بابر اعظم ایک چھکے اور 4 چوکوں کی مدد سے 74 رنز بنا کر نور احمد کی گیند پر کیچ آؤٹ ہوگئے، جبکہ افتخار احمد اور شاداب خان شاندار کھیل کا مظاہرہ کرتے ہوئے 40،40 رنز بنا کر آؤٹ ہوئے۔افغانستان کی جانب سے نور احمد نے3، نوین الحق نے 2 جبکہ محمد نبی اور عظمت اللہ عمرزئی نے ایک ایک وکٹ حاصل کی۔
واضح رہے کہ پاکستان اور افغانستان میگا ایونٹ کے چار چار میچز کھیل چکے ہیں جن میں شاہین دو جبکہ افغان ٹیم ایک میچ میں فتح حاصل کرسکی ہے۔ٹاس کے موقع پر گفتگو کرتے ہوئے قومی کپتان بابر اعظم نے کہا ہے کہ ٹیم میں ایک تبدیلی کی گئی ہے. آل راؤنڈر محمد نواز کی جگہ نائب کپتان شاداب خان کو سکواڈ کا حصہ بنایا گیا ہے۔ٹاس کے موقع پر افغان ٹیم کے کپتان حشمت اللہ شاہدی کا کہنا تھا کہ وہ بھی ٹاس جیت کر پہلے بیٹنگ ہی کرتے، پاکستان کو کم ٹوٹل پر آؤٹ کرنے کی کوشش کریں گے ٹیم میں ایک تبدیلی کی گئی ہے. فضل حق فاروقی کی جگہ نور احمد کو سکواڈ میں شامل کیا ہے۔پوائنٹس ٹیبل پر بھارت کیویز کو شکست دے کر پہلی پوزیشن پر براجمان ہے.پاکستان کا ٹیبل پر 4 پوائنٹس کیساتھ پانچواں نمبر ہے جبکہ افغان ٹیم دو پوائنٹس کیساتھ دسویں نمبر پر موجود ہے۔
