دنیاوی محبت نے مسلمانوں کی صلاحیتیں زنگ آلود کردیں:مولانا اشرف جلالی

لاہور(خصوصی نامہ نگار) تحریک لبیک یارسول اللہﷺ وتحریک صراط مستقیم کے زیراہتمام جنازگاہ ٹہی میں ’’قوت اسلام کانفرنس‘‘ کا انعقاد کیا گیا۔ صدارت شیخ الحدیث پیر سید مفتی محمدلقمان شاہ نے کی جبکہ مہمان خصوصی مولانا گل محمد سیالوی تھے۔کانفرنس سے خطاب کرتے تحریک لبیک یا رسول اللہﷺ اور تحریک صراط مستقیم کے بانی ڈاکٹر اشرف آصف جلالی نے کہا یہ حقیقت ہے کہ دنیاوی محبت نے آج مسلمانوں کی صلاحیت کو زنگ آلود کردیا ہے۔انہوں نے کہا پوری دنیا پر غلبہ اسلام کیلئے عشق رسولؐ درکار ہے۔ آپؐ کے اسوۂ حسنہ میں ہر مسئلے کا حل موجود ہے۔حضوراکرمؐ نے مستقبل میں کثرت کے باوجود اپنی امت کی کمزوری کی وجہ دنیا سے پیار اور موت سے نفرت کو قرار دیا ہے۔کانفرنس میں مولانا محمدعامر جاوید رضوی‘ علامہ محمد خزیمہ رضوی سمیت کثیر تعداد میں علماء اور عوام نے شرکت کی۔