ترقی پذیر ممالک پر قرضوں کے بوجھ جیسے کلیدی مسائل کو حل کیا جائے: وزیر خزانہ

واشنگٹن+اسلام آباد(نیٹ  نیوز+نمائندہ خصوصی)وزیر خزانہ محمد اورنگزیب نے کہا ہے ترقی پذیر ممالک پر قرض کے بڑھتے بوجھ جیسے کلیدی مسائل کو حل کیا جائے۔ محمد اورنگزیب نے واشنگٹن میں جی 24 وزرا اور گورنرز کے اجلاس سے خطاب کرتے ہوئے موسمیاتی تبدیلیوں اور آبادی کی بڑھتی ہوئی شرح پر قابو پانے کے لیے انسانی ترقی کے لیے کارفرما اداروں کی مشترکہ کوششوں پر زور دیا۔ انہوں نے اپنی گفتگو میں ترقی پذیر ممالک بالخصوص پاکستان میں بچوں کی ذہنی و جسمانی نشوونما میں کمی جیسے مسائل سے نمٹنے کے لیے بہتر اشتراک کی ضرورت و اہمیت پر روشنی ڈالی۔ سینیٹر محمد اورنگزیب نے مالی سال 25-2024 کے دوران پاکستان کے جی 24 بیورو کے دوسرے نائب صدر بننے پر اپنے بیان میں ترقی پذیر ممالک پر قرض کے بڑھتے ہوئے بوجھ جیسے کلیدی مسائل کے حل پر زور دیا۔وزیر خزانہ نے بدلتے موسمی حالات کے خطرات کے تدارک اور عالمی مالیاتی اداروں میں ترقی پذیر ممالک کی نمائندگی بڑھانے کی ضرورت کو بھی اجاگر کیا۔