فضائی آلودگی میں اضافہ، لاہور میں سکول کھلنے کے اوقات کار تبدیل

 صوبائی دارالحکومت لاہور میں دن بدن فضائی آلودگی میں اضافے کے باعث سکول کھلنے کے اوقات تبدیل کر دئیے گئے، جاری کئے گئے نوٹیفکیشن کے مطابق بچوں کیلئے سکول صبح 8 بجکر 45 منٹ پر کھلیں گے۔ سکول کھلنے کا نیا وقت 28 اکتوبر تا 31 جنوری 2025ءتک رہے گا۔محکمہ تحفظ ماحول پنجاب کی جانب سے متعلقہ اداروں کو فضائی آلودگی میں اضافے کے پیش نظر ضروری اقدامات کیلئے ہدایات جاری کی گئی ہیں۔ نوٹیفکیشن کے مطابق بچوں کی اسمبلی کلاس روم میں ہو گی اور آوٹ ڈور سرگرمیاں معطل کرنے کی ہدایت کی گئی ہے۔لاہور میں 31 جنوری 2025ءتک ہر قسم کی آتشبازی پر بھی سخت پابندی ہوگی۔ نوٹیفکیشن میں مزید کہا گیا ہے کہ عوام سموگ سے بچنے کیلئے ماسک اور دیگر حفاظتی تدابیر اختیار کریں، گھروں کی کھڑکیاں، دروازے بند رکھیں اور زیادہ دیر کھلی جگہوں پر نہ رہیں۔ اس حوالے سے سینئر صوبائی وزیر مریم اورنگزیب نے کہا کہ سموگ میں کمی کیلئے تمام افراد حکومت کا ساتھ دیں اور ہر قسم کے دھویں کی فوری اطلاع 1373 پر کریں۔ ای پی اے فوری کارروائی کرے گا۔مریم اورنگزیب نے اپیل کی کہ شہری اپنی گاڑیوں کی فوری فٹنس کروائیں اور سموگ میں مزید اضافہ نہ کریں۔واضح رہے کہ چند روز قبل محکمہ اسکول ایجوکیشن نے موسم سرما کیلئے سرکاری سکولوں کے اوقات کار تبدیل کردیئے تھے۔ اس حوالے سے ا سکول ایجوکیشن ڈیپارٹمنٹ نے نئے اوقات کار کا نوٹیفکیشن جاری کردیاتھا۔ نوٹیفکیشن کے مطابق سکول صبح 8بج کر 45منٹ پرلگیں گے۔چھٹی 2 بج کر 45منٹ پر ہوا کرے گی جبکہ جمعہ کے روز چھٹی دوپہر پونے ایک بجے ہوگی۔اسی طرح ڈبل شفٹ سکولوں میں پہلی شفٹ کو روزانہ 12 بج کر 45منٹ پر چھٹی ہوا کرے گی۔قبل ازیں پنجاب بھر میں سرکاری سکولوں کے اساتذہ کے اوقات کار میں تبدیلی کردی گئی تھی۔ محکمہ تعلیم پنجاب نے اساتذہ کے اوقات کار میں تبدیلی کا نوٹیفکیشن جاری کردیا تھا۔بتایاگیا تھا کہ نوٹیفکیشن کے مطابق اساتذہ صبح 7 بج کر 45 منٹ پر آئیں گے اور دوپہرڈھائی بجے چھٹی ہوگی۔نوٹیفکیشن میں بتایا گیا ہے کہ جمعہ کے روز اساتذہ کی چھٹی دوپہر ساڑھے 12 بجے ہوگی اور ہفتے کو اساتذہ صبح 9 سے دوپہر 12 بجے تک ڈیوٹی دیں گے۔