کراچی + اسلام آباد(نوائے وقت رپورٹ+ آئی این پی) ایم کیو ایم کے رہنما خالد مقبول صدیقی نے کہا ہے کہ پرویز رشید بتائیں انہیں کیسے پتہ چلا ایم کیو ایم اور تحریک انصاف کا مک مکا ہوا ہے۔ تقریب سے خطاب کرتے ہوئے انہوں نے کہاکہ عمران خان سندھ کے عوام کو جگانا چاہتے ہیں تو یہ ان کا حق ہے۔ دوسری جانب حکومتی ترجمان نے وضاحت کی ہے کہ پرویز رشید نے نہیں کہا کہ ایم کیو ایم اور تحریک انصاف کا مک مکا ہوا ہے۔دوسری طرف وفاقی وزیر اطلاعات و نشریات سینیٹر پرویز رشید نے کہا ہے کہ لاہور میں تحریک انصاف کے جلسے پر کوئی اعتراض نہیں جلدی کریں خوش آمدید کہیں گے، عمران خان کے خفیہ مطالبے کے بارے میں معلوم نہیں، ایک سڑک پر چند لوگ جب تک چاہیں بیٹھیں، خالد مقبول صدیقی جب ملیں گے تو بتاﺅں گا میرا اشارہ کس طرف تھا۔ نجی ٹی وی سے گفتگو کرتے ہوئے انہوں نے کہا کہ تحریک انصاف لاہور میں جلدی کرے ہم اسے خوش آمدید کہیں گے، ہمیں اس پر کوئی اعتراض نہیں ہم کنٹینرز صرف سکیورٹی کےلئے لگاتے ہیں، تحریک انصاف کے کارکنوں کو روکنے کے لئے نہیں، اب تو کراچی میں تحریک انصاف نے خود کنٹینر لگوائے تھے۔ پرویز رشید نے کہا کہ عمران خان کے خفیہ مطالبے کے بارے میں ابھی تک معلوم نہیں ہو سکا ، ہم نے جوڈیشل کمشن کےلئے سپریم کورٹ کو خط لکھ دیا ہے۔ ہم دھرنے ختم کرنے کی بات نہیں کرتے، ایک سڑک پر چند لوگ جب تک چاہیں بیٹھیں۔ ہم پاکستان کی معیشت کو مضبوط کرنے کی کوشش کر رہے ہیں لیکن دھرنوں کے قائدین اسے نقصان پہنچا رہے ہیں۔
خالد مقبول/پرویز رشید