پاکستانی قوم محبت کرنیوالی اور پرامن قوم ہے:مسٹرمائیکل جیفری گیلیس

گوجرانوالہ (نمائندہ خصوصی ) پاکستانی قوم محبت کرنیوالی اور پرامن قوم ہے مجھے پاکستانی قوم پر فخر اور پیار ہے رگبی کے فروغ کیلئے اے ایف ایل کی خدمات قابل ستائش ہیں۔ ان خیالات کا اظہار آسٹریلین کوچ مسٹرمائیکل جیفری گیلیس نے جناح سٹیڈیم میں منعقدہ ایک روزہ فری رگبی ٹریننگ کیمپ کے موقع پر خطاب کرتے ہوئے کیا۔انہوں نے کہا کہ پاکستانی قوم باصلاحیت قوم ہے نوجوانوں میں کافی ٹیلنٹ ہے ۔ مناسب رہنمائی سے بہترین کھلاڑی پیدا کئے جا سکتے ہیں ۔ انہیں پاکستان آ کر اور پاکستانی نوجوانوں سے ملکر بہت خوشی ہوئی انکے خاندان والے انکے دورہ پاکستان کیخلاف تھے اور انہوں نے دہشتگردی کے حوالے سے انہیں ڈرایا مگر اس کے باوجود وہ پاکستان آئے اور انہیں عوام نے بہت پیار دیا۔ اس موقع پر فرط جذبات سے مسٹر مائیکل جیفری کی آنکھوں سے آنسو بھی چھلک پکڑے۔ٹریننگ کیمپ کالجز کے درجنوں طلباء و طالبات کو رگبی کی ٹریننگ و کوچنگ کی گئی ۔ قبل ازیں کراچی ‘ملتان ‘لیاقت آباد ‘لاہور ‘فیصل آباد ‘اسلام آباد میں بھی ٹریننگ سیشن کا انعقاد ہو چکا ہے ۔ اس موقع پر آسٹریلین فٹبال لیگ پاکستان کے عہدیداران ڈاکٹر طاہر رضا ‘میاں محمد ناصر ‘عطاء اﷲ خاں ‘میاں بلال ناصر ایڈووکیٹ ‘چیئرمین وویمن ونگ پنجاب عائشہ سلیم چیمہ ‘چوہدری ذوالفقار ‘جمیل کامران ‘اطہر محمود گوندل ‘رانا اعجاز ‘مہر شہباز گل و دیگر بھی موجود تھے ۔AFL گوجرانوالہ ایسوسی ایشن کی جانب سے مہمانوں کو شیلڈز بھی دی گئیں ۔