لاہور(سپورٹس رپورٹر)آئندہ ماہ سے شروع ہونے والی ٹیسٹ سیریز کیلئے انگلینڈ کی مینز کرکٹ ٹیم 2 اکتوبر کو ملتان پہنچے گی، پہلا مقابلہ 7 تاریخ سے شیڈول ہے۔انگلش کرکٹ ٹیم اگلے مہینے کی 2 تاریخ کو پاکستانی سرزمین پر قدم رکھے گی جہاں اسے تین ٹیسٹ میچز کی سیریز میں میزبان سے پنجہ آزمائی کرنے کا موقع ملے گا، قومی ٹیم اور انگلینڈ کا پہلا پانچ روزہ میچ ملتان میں 7 اکتوبر سے 11 اکتوبر تک کھیلا جائیگا۔دوسرا ٹیسٹ میچ 15 اکتوبر سے 19 اکتوبر تک ملتان میں کھیلا جائیگا جبکہ سیریز کا آخری ٹیسٹ میچ 24 اکتوبر سے 28 اکتوبر تک راولپنڈی میں ہوگا۔اس سے قبل پاکستان کرکٹ بور کی جانب سے پاک انگلینڈ ٹیسٹ سیریز کے نظر ثانی شدہ شیڈول کا اعلان کیا گیا تھا۔تین ٹیسٹ میچوں کی سیریز کے میچز ابتدائی طور پر کراچی، ملتان اور پنڈی میں شیڈول تھے تاہم کراچی میں چیمپئنز ٹرافی کیلئے جاری تعمیراتی کام کے باعث وہاں اب میچ نہیں ہوگا۔پی سی بی نے مذکورہ ٹیسٹ سیریز کا نظر ثانی شیڈول جاری کیا تھا جبکہ نیشنل سٹیڈیم کراچی میں شیڈول ٹیسٹ کو ملتان کرکٹ سٹیڈیم منتقل کردیا گیا ہے، ابتدائی دو ٹیسٹ میچز ملتان میں کھیلے جائیں گے۔