افغان کرکٹرز دنیا میں سب سے باصلاحیت کھلاڑی ہیں : گلبدین نائب 

لاہور(سپورٹس رپورٹر)افغانستان ٹیم کی اس کارکردگی پر موجودہ ٹیم کے سینئر کھلاری گلبدین نائب نے افغان کرکٹرز کو موجودہ دور میں دنیا میں سب سے باصلاحیت کھلاڑی قرار دیدیا ہے۔افغان کرکٹ بورڈ کے یوٹیوب چینل پر انٹرویو میں گلبدین نائب نے کہا کہ ان کی ٹیم صلاحیتوں اور ٹیلنٹ کے لحاظ سے دنیائے کرکٹ میں بہت آگے ہیں۔ کوئی مانے یا نہ مانے لیکن ٹیلنٹ میں ہم بہت با صلاحیت ہیں۔ ایسا نہیں ہے کہ ہم نے یہ سب کامیابیاں دو سال، ایک سال یا حالیہ ورلڈ کپ یا ٹی ٹونٹی ورلڈ کپ میں ہی حاصل کی ہیں، جب ہم 2016 میں پہلا ایشیا کپ کھیلنے آئے تو آگے بڑھنے کے خیال سے ایک ایک ٹیم کا ٹارگیٹ کیا اور یوں قدم بہ قدم منزل پاتے گئے۔ ایک وقت تھا کہ ہمارے پاس کچھ نہیں تھا، ایک بیٹ سے پوری ٹیم کھیلتی تھی۔ ہم بہت خوش قسمت ہوتے تھے جب ہمیں کسی دورے پر دو یا تین ٹراؤزر اور شرٹس مل جاتی تھیں۔ گرائونڈ تو بہت دور کی بات ہے، ہمارے پاس تو کابل میں پریکٹس کی بھی جگہ نہیں تھی۔افغانستان کیلئے 83 میچز کھیلنے والے گلبدین نے کہا کہ کامیابیوں کیساتھ بڑی ٹیموں کیخلاف جیت کے بہت قریب جا کر ہار جاتے تھے اور ایسی چھوٹی غلطیاں جس کو ہم سمجھ نہیں پا رہے تھے۔ پھر ہم نے جب ان غلطیوں پر قابو پانا شروع کیا تو پاکستان کو ہرایا، بھارت سے برابر رہے۔انہوں نے اس کا کریڈٹ افغان ٹیم کے سینئر کھلاڑیوں کو دیتے ہوئے کہا کہ یہ سب سینئر کھلاڑیوں کا لگایا پودا تھا جس کا پھل ہم کھا رہے ہیں۔ایسا نہیں کہ اس سب کے بعد ہمارا سفر ختم ہو گیا ہے، ہمارا ابھی بہت سفر باقی ہے کیونکہ کامیابی حاصل کرنا آسان لیکن اس نام کو برقرار رکھنا بہت مشکل ہوتا ہے۔