انگلینڈ کیخلاف ٹیسٹ سیریز ‘قومی سکواڈ کیلئے مشاورت رواں ہفتے ہوگی  

لاہور(سپورٹس رپورٹر) پاک انگلینڈ ٹیسٹ سیریز کے سلسلہ میں پاکستانی ٹیسٹ سکواڈ کیلئے مشاورت رواں ہفتے کے دوران ہو گی۔ذرائع کے مطابق ریڈ بال ہیڈ کوچ جیسن گلیسپی سلیکٹرز کے ساتھ مل کر ٹیم کو حتمی شکل دیں گے، ٹیسٹ ٹیم کے کپتان شان مسعود کو تبدیل کرنے کا امکان نہیں۔ریڈ بال ہیڈ کوچ جیسن گلیسپی آج لاہور پہنچیں گے۔ جیسن گلیسپی اور گیری کرسٹن بھی مستقبل کی منصوبہ بندی کیلئے ملاقات کریں گے۔وائٹ بال ہیڈ کوچ گیری کرسٹن کی پاکستان موجودگی کے دوران پاکستان وائٹ بال ٹیم پر مشاورت ہو گی، انگلینڈ کیخلاف ٹیسٹ سیریز کے اختتام کے اگلے روز پاکستان وائٹ بال ٹیم نے آسٹریلیا روانہ ہونا ہے، پاکستان نے آسٹریلیا میں 4 سے 18 نومبر تک تین ون ڈے اور تین ٹی ٹونٹی میچز کی سیریز کھیلنا ہے۔دورہ آسٹریلیا کے بعد پاکستان ٹیم نے زمبابوے اور جنوبی افریقہ کا دورہ کرنا ہے۔