پاکستان کرکٹ کا بہترین مستقبل، کنیکشن کیمپ آج، پی سی بی حکام، کوچز، کھلاڑی سر جوڑیں گے

لاہور (سپورٹس رپورٹر)پاکستان کرکٹ بورڈ آج مقامی ہوٹل میں ایک اعلیٰ سطحی کنیکشن کیمپ کی میزبانی کریگا جس کا مقصد پاکستان کرکٹ کے مستقبل کیلئے ایک واضح اور متفقہ وژن قائم کرنا ہے۔ یہ سٹریٹجک سیشن پی سی بی کے چیئرمین محسن نقوی کی اس سال کے شروع میں عہدہ سنبھالنے کے بعد سے سابق کرکٹرز کیساتھ مشاورت کے سلسلے کے بعد ہورہا ہے۔ کیمپ میں بابر اعظم ‘فخر زمان‘ محمد رضوان‘ صائم ایوب‘ سلمان علی آغا‘ سعود شکیل‘شاداب خان‘ شاہین شاہ آفریدی اور شان مسعود سمیت نو ایلیٹ کرکٹرز اکٹھے ہونگے۔ قومی ٹیم کے ہیڈ کوچز جیسن گلیسپی اور گیری کرسٹن، اسسٹنٹ کوچ اظہر محمود اور ہائی پرفارمنس سپیشلسٹ ڈیوڈ ریڈ بھی شامل ہوں گے۔ چیئرمین محسن نقوی سیشن کی قیادت کریں گے۔ پی سی بی کی لیڈرشپ ٹیم بھی ان کے ہمراہ ہوگی۔ کیمپ کا بنیادی مقصد مشترکہ وژن اور مشن کی وضاحت کرنا ہے۔ 1952 ء میں ٹیسٹ سٹیٹس حاصل کرنے کے بعد سے پاکستان کرکٹ کو نمایاں کرنیوالی شان اور بہترین مقام کو دوبارہ زندہ کرنے کیلئے روڈ میپ ترتیب دینا ہے۔ سیشن کھلاڑیوں اور پی سی بی کے درمیان مضبوط تعاون کو فروغ دینے پر توجہ مرکوز کریگا جبکہ بورڈ سٹریٹجک اہداف کو پورا کرنے میں کھلاڑیوں کی مدد کرنے کے اپنے عزم کا اعادہ کریگا۔حتمی مقصد یہ ہے کہ کھلاڑی شاندار پرفارمنس کے ذریعے کرکٹرز کی اگلی جنریشن کو متاثر کرنے میں اہم کردار ادا کریں۔چیئرمین پی سی بی محسن نقوی نے کہاہے کہ کنیکشن کیمپ پاکستان کرکٹ کو اس کی سابقہ شان میں بحال کرنے کیلئے ہمارے نقطہ نظر کو یکجا کرنے کی جانب ایک اہم قدم ہے۔ ہمارا مقصد کلیدی مسائل کی نشاندہی کرنا، کھلی بات چیت کو فروغ دینا اور اجتماعی طور پر آگے بڑھنے والے سٹریٹجک راستے پر متفق ہونا ہے۔ ان چیلنجوں سے براہ راست نمٹنے کے ذریعے، ہم واضح، قابل عمل اہداف قائم کریں گے جو ہمارے ْپرجوش شائقین کی توقعات پر پورا اتریں گے۔ پی سی بی پر امید ہے کہ یہ سیشن، جو سابق کرکٹرز کیساتھ ہونے والی بات چیت کے بعد ہے، نتائج پر مبنی حکمت عملی کا باعث بنے گا جس سے پلیئر مینجمنٹ اور ٹیم کی کارکردگی دونوں میں بہتری آئیگی۔ یہ پاکستان کرکٹ کو نئی شکل دینے کے جاری سفر کا پہلا قدم ہے۔ پی سی بی شائقین کو اپنے مشن کے قریب رکھتے ہوئے طویل مدتی کامیابی کو یقینی بنانے کیلئے ان باہمی تعاون کی کوششوں کو جاری رکھے گا۔پاکستان ٹیسٹ ٹیم کے کپتان شان مسعود نے کہا ہے کہ یہ ہمارے لیے بطور کھلاڑی ایک اہم لمحہ ہے۔ ہم پی سی بی کیساتھ کام کرنے کیلئے پوری طرح پرعزم ہیں تاکہ اس فخر اور جذبے کو بحال کیا جا سکے جس کیلئے پاکستان کرکٹ پہچانی جاتی ہے۔ یہ بات چیت ہمیں مستقبل کیلئے  مضبوط راستہ طے کرنے میں مدد کریگی اور ہم مشترکہ کوشش کا حصہ بننے کیلئے پرجوش ہیں۔ سیشن کے نتائج میں کارکردگی کے معیار، کھلاڑیوں کی ترقی کے پروگرام اور گراس روٹ کرکٹ کو بڑھانے کیلئے حکمت عملی شامل ہوگی۔ یہ اقدام پی سی بی کے وژن سے ہم آہنگ ہے تاکہ نہ صرف ٹیم کی فوری کارکردگی کو بہتر بنایا جا سکے بلکہ کھیل میں عمدہ کارکردگی کی طویل مدتی پائیداری کو بھی یقینی بنایا جا سکے۔پاکستان مینز ٹیم ریڈ بال کے ہیڈ کوچ جیسن گلیسپی نے کہا ہے کہ یہ کیمپ کوچنگ سٹاف اور کھلاڑیوں کے درمیان کھلے مکالمے اور صف بندی کا  قیمتی موقع فراہم کرتا ہے۔ ہم سب ایک ہی مقصد کی طرف کوشاں ہیں اور وہ ہے پاکستان کرکٹ کا معیار بلند کرنا اور جیتنے کا کلچر پیدا کرنا۔پاکستان مینز ٹیم وائٹ بال کے ہیڈ کوچ گیری کرسٹن نے کہا ہے کہ ایک کوچ کے طور پر، یہ میری ذمہ داری ہے کہ میں کھلاڑیوں کی نشوونما کیلئے بہترین ماحول قائم کروں۔ ہم وائٹ بال کرکٹ میں اپنے نقطہ نظر کو بہتر بنانے پر توجہ مرکوز کریں گے تاکہ بین الاقوامی مقابلوں کے اعلیٰ درجے کے معیارات کو پورا کیا جا سکے۔ سب سے اہم چیز یہ ہے کہ ہم اس بات کو یقینی بنانے کیلئے ہر ممکن کوشش کریں گے کہ پاکستانی عوام کو اپنی قومی ٹیم پر فخر ہو۔