سکواش پریمیئر لیگ کی اختتامی تقریب آج ہو گی

لاہور (سپورٹس رپورٹر) پنجاب سکواش ایسوسی ایشن کے تحت ہونیوالی پہلی ایف ایم سی سکواش پریمیئر لیگ کی اختتامی تقریب آج بروز پیر دوپہر دو بجے ہوگی جس میں ایک میچ بھی کھیلا جائے گا۔ تقریب اور میچ پاکستان ٹیلی ویژن پر لائیو نشر ہوگا۔ ٹریٹ فالکنز کی ٹیم حیران کن طورپر آخری دو میچز جیت کر پہلے نمبر پر پہنچ چکی ہے ۔ساتویں دن ٹریٹ فالکنز نے فیورٹ سروس سٹارز کو 4-3 سے ہرا یا جبکہ دوسرے میچ میں ایف ایم سی سٹرائیکرز نے ڈائمنڈ پینٹس لائنز کو 4-3 سے ہرا یا جبکہ ساتویں دن کے آخری میچ میں ٹرسٹ میورکس نے جی این سی کو 5-1 سے ہرا دیا۔پنجاب سکواش ایسوسی ایشن کے صدر ڈاکٹر ندیم مختار اور سیکرٹری شیراز سلیم کا کہنا تھا کہ سکواش پریمیئر لیگ سے ہمارے کھلاڑیوں کو قومی سطح پر اچھے مقابلے میسر ہوئے ہیں مستقبل میں ایسے لیگ میں ٹیموں اور کھلاڑیوں کی تعداد میں اضافہ کیا جائے گا۔