ٹیکنیکل ڈائریکٹر پی ایف ایف شہزاد انور اے ایف سی کوچ ایجوکیشن پینل میں شامل

لاہور(سپورٹس رپورٹر) ٹیکنیکل ڈائریکٹر پی ایف ایف شہزاد انور کو پہلے اے ایف سی کوچ ایجوکیشن پینل میں شامل کر لیاگیا۔ وہ ایشیاء بھر سے اس پینل میں شامل دیگر 12فٹ بال کوچز کے ہمراہ خدمات سر انجام دیں گے۔ اس سلسلہ میں انہوں نے کوالا لمپور، ملائیشیامیں20اگست کو منعقد ہونے والی پہلی میٹنگ میں شرکت کی جس میں ایشیاء میں فٹ بال کوچز ایجوکیشن اور ڈیویلپمنٹ کے لئے آئندہ کا لائحہ عمل طے کیا گیا۔ مخدوم فیصل صالح حیات صدر پاکستان فٹ بال ٖفیڈریشن نے شہزاد انور کی صلاحییتوں کو سراہتے ہوئے ان کی اے ایف سی کوچ ایجوکیشن پینل میں شمولیت کو پاکستان کے لئے باعث عزت اور فٹ بال کے لئے خوش آئیند قرار دیا ہے۔ انہوں نے مزید کہا کہ ہم نے ہمیشہ کوچز کی ترویج ترقی کو بنیادی ضرورت سمجھتے ہوئے بہت توجہ دی ہے ۔ انہوں نے اس عزم کا اعادہ بھی کیا کہ پی ایف ایف مستقبل میں بھی پاکستانی فٹ بال کوچز کی بہتری کے لئے تمام ممکنہ وسائل بروئے کار لائے گی۔