کراچی(کرائم رپورٹر) کراچی کے مختلف علاقوں میں منگل کو فائرنگ کے واقعات میں مدرسے کے اساتذہ سمیت 3 افراد ہلاک اور ایک نوجوان زخمی ہوگیا۔ تفصیلات کے مطابق گلشن اقبال کے بلاک6 میں مسلح ملزمان نے مدینہ مسجد سے متصل مدرسہ دارالاطفال میں گھس کر اندھا دھند فائرنگ کردی جسکے نتیجے میں مدرسے کے دو اساتذہ32 سالہ مفتی کامران ولد شمشیر اور46 سالہ مفتی غلام اکبر ولد غلام فرید ہلاک ہوگئے جبکہ فائرنگ کے بعد ملزمان فرار ہوگئے۔ واقعہ منگل کی صبح تقریباً ساڑھے دس بجے پیش آیا۔ پولیس کے مطابق تفتیش کے دوران پتہ چلا ہے کہ دونوں ملزمان موٹر سائیکل پر آئے تھے اور دونوں اساتذہ کو نشانہ بنانے کے بعد مدرسے کی پہلی منزل پر بھی گئے تھے جس سے اندازہ ہوتا ہے کہ وہ کسی اور کو بھی نشانہ بنانا چاہتے تھے۔ ادھر کورنگی نمبر ساڑھے تین میں مسلح افراد نے ایک شخص 34 سالہ قائم رضا ولد ناصر عباس رضوی کو فائرنگ کرکے بلاک کردیا جبکہ ملیر15 کے علاقے میں نامعلوم افراد کی فائرنگ سے ایک نوجوان19 سالہ محمد توصیف ولد محمد الیاس زخمی ہوگیا۔
کراچی فائرنگ