سائوتھمپٹن ٹیسٹ :پاکستان فالوآن کاشکار اظہر علی کی سنچری ‘ٹیم 273رنز پر آئوٹ

لاہور(سپورٹس ڈیسک) پاکستان ٹیم انگلینڈ کیخلاف سیریز کے تیسرے ٹیسٹ میچ میں فالو آن کاشکار ہوگئی ۔ گرین شرٹس پہلی اننگز میں کپتان اظہر علی کی سنچری کی بدولت 273رنز بناکر آئوٹ ہوگئی ۔سائوتھمپٹن میں کھیلے جا رہے ٹیسٹ میچ کے تیسرے دن اسد شفیق پانچ ‘فواد عالم اکیس ‘محمد رضوان 53‘یاسر شاہ بیس ‘شاہین شاہ آفریدی تین ‘محمد عباس ایک اور نسیم شاہ صفر پر آئوٹ ہوئے ۔ اظہر علی 141رنز پر ناٹ آئوٹ رہے ۔ جیمز اینڈرسن نے پانچ ‘سٹورٹ براڈ نے دو جبکہ کرس ووکس اور ڈوم بیس نے ایک ایک وکٹ حاصل کی ۔ انگلینڈ نے پہلی اننگز میں 8وکٹوں پر 583رنز بناکر ڈکلیئر کی تھی ۔پاکستان کو اننگز کی شکست سے بچنے کیلئے مزید 310رنزدرکار جبکہ تمام وکٹیں باقی ہیں ۔ پاکستان کی طرف سے دوسری اننگز میں کپتان اظہر علی اور شان مسعود کھیل کا آغاز کریں گے ۔ آج میچ کا چوتھا دن ہے ۔ میزبان ٹیم کو سیریز میں ایک صفر کی برتری حاصل ہے ۔