آئی سی سی نے ورلڈ کپ کے وارم میچز کا شیڈول جاری کردیا

لاہور(سپورٹس رپورٹر)انٹرنیشنل کرکٹ کونسل نے ورلڈ کپ کیلئے وارم اپ میچز کا شیڈول جاری کردیا۔ شیڈول کے مطابق وارم اپ میچز کا آغاز 29 ستمبر سے ہوگا، کرکٹ ورلڈ کپ سے پہلے 10 وارم اپ میچز کھیلے جائیں گے۔شیدڈول کے مطابق پاکستان ٹیم 2 وارم اپ میچز کھیلے گی، پاکستان اپنا پہلا وارم اپ میچ نیوزی لینڈ کے خلاف 29 ستمبر کو حیدر آباد دکن میں کھیلے گا۔پاکستان ٹیم کا دوسرا وارم اپ میچ 3 اکتوبر کو آسٹریلیا کے خلاف حیدرآباد دکن میں ہی کھیلا جائیگا۔ پہلے وارم اپ میچ میں بنگلہ دیش اور سری لنکا کی ٹیمیں آمنے سامنے آئیں گی جبکہ 29 ستمبر کو ہی جنوبی افریقہ اور افغانستان کے درمیان وارم اپ میچ کھیلا جائیگا۔30 ستمبر کو بھارت اور انگلینڈ کے درمیان میچ گوہاٹی میں کھیلا جائیگا جبکہ اسی روز آسٹریلیا اور نیدرلینڈز کی ٹیمیں بھی آمنے سامنے ہوں گی۔انگلینڈ اور بنگلہ دیش کے درمیان میچ 2 اکتوبر کو کھیلا جائیگا جبکہ نیوزی لینڈ اور جنوبی افریقہ کی ٹیمیں بھی 2 اکتوبر کو ہی مدمقابل ہوں گی۔3 اکتوبر کو افغانستان اور سری لنکا کے درمیان وارم اپ میچ کھیلا جائیگا، اسی روز بھارت اور نیدرلینڈز کی ٹیموں کا بھی آمنا سامنا ہو گا۔