رحیم یار خان (نوائے وقت رپورٹ) پنجاب میں رحیم یار خان کے کچے کے علاقے میں ڈاکوؤں کے حملے میں شہید اہل کاروں کی ایک ویڈیو سوشل میڈیا پر وائرل ہو گئی، جس میں وہ گفتگو کے دوران اپنی شہادت کا ذکر کر رہے ہیں۔ ’’لگتا ہے آج شہید ہو جائیں گے‘‘۔ سماجی رابطوں کے پلیٹ فارمز پر وائرل ویڈیو کچے کے علاقے میں ڈاکوؤں کے راکٹ حملے میں شہید ہونے سے کچھ دیر پہلے کی ہے۔ ویڈیو میں سنا جا سکتا ہے کہ ایک پولیس اہل کار اپنے ساتھی ابرار کو ازراہ تفنن مخاطب کرتے ہوئے کہتا ہے کہ ’’یہ لو رائفل پکڑو، لگتا ہے آج آخری وقت آ گیا ہے‘‘۔ دوسری طرف حملہ میں زخمی اہلکار کی گفتگو بھی سامنے آئی ہے۔ زخمی نے بتایا کہ ڈاکو گنے کے کھیت میں گھات لگائے بیٹھے تھے۔ ڈاکوؤں نے چلتی ہوئی گاڑی پر راکٹ لانچر سے حملہ کیا۔ گاڑی خراب نہیں تھی۔ ہماری ہفتے بعد سکریننگ ہوتی ہے۔ ہم سکرین ہوکر واپس آرہے تھے۔ انہوں نے چلتی گاڑی پر اٹیک کیا۔ زیادہ تر اہلکار موقع پر ہی شہید ہوئے۔ ہم نے کرالنگ کرتے ہوئے جان بچائی۔