لاہور (نمائندہ سپورٹس) پاکستان سپر لیگ کی ٹیم پشاور زلمی نے 1992 ورلڈکپ کے چیمپئن کپتان عمران خان کو ٹیم کا معاون مقرر کردیا۔پشاور زلمے کے سربراہ جاوید آفریدی کا کہنا ہے کہ عمران خان معاون کے طورپر شاہد آفریدی کی زیر قیادت ٹیم کو ویژن دیں گے۔عمران خان نے ٹیم کے معاون کے طور پر دستخط کردیے ہیں، ہم ان کے پشاورزلمی سے منسلک ہونے پر بہت خوش ہیں۔ زلمی کا مطلب ہی ہمارے خطے کے نوجوان ہیں اور عمران خان جیسے حقیقی ہیرو سے بہتر کون ہوسکتا ہے جو معاون کی صورت میں ان کی تربیت کرے۔جاوید آفریدی نے عمران خان کی سیاسی حیثیت کے حوالے سے واضح کردیا کہ ان کی تقرری میں سیاست کا کوئی عمل دخل نہیں یہ خالص کرکٹ کا معاملہ ہے‘ عمران خان کے حوالے سے آفریدی نے کہا کہ وہ اتھلیٹ کیلئے قابل تقلید ہیں اور بطور کھلاڑی ان کا ریکارڈ اور کردار ناقابل موازنہ ہے۔ جو یہ سمجھتے ہیں وہ عمران خان کی کرکٹ کیلئے خدمات اور ان کے ورثے اور پشاور زلمی کے ارادوں اور ویژن دونوں کے ساتھ زیادتی کررہے ہیں۔ عمران خان جب کبھی بھی وہ ٹیم اور زلمی کے ویژن کے لیے اپنے خیالات دے پائیں ہم ان کو شامل کریں گے۔