پاکستان اور چین آزمودہ کار دوست اور سٹرٹیجک ساتھی ہیں جو آزمائش کے ہر موقع پر ایک دوسرے کے کام آئےصدرژی جن پنگ

اسلام آباد(صبا ح نیوز)صدر مملکت ممنون حسین کو چین کے صدرژی جن پنگ نے مبارک با د اور نیک تمناوں کا پیغام ارسال کیا ہے۔ صدر مملکت کو چین کے سفیریا جینگ نے یہ پیغام خصوصی طور پر پہنچایا۔ چین کے صدر نے کہا کہ اپنی سالگرہ پر میر ی پر خلوص مبارکباد قبول کیجئے۔انہوں نے کہا کہ پاکستان اور چین آزمودہ کار دوست اور سٹرٹیجک ساتھی ہیں جو آزمائش کے ہر موقع پر ایک دوسرے کے کام آئے۔ دونوں ممالک کے درمیان زندگی کے ہر شعبے میں تعاون میں تیزی سے اضافہ ہو رہا ہے جو باعث مسرت ہے۔ چینی صدر نے مزید کہا انہیں پاک چین دوستی سے بے پناہ توقعات ہیں اور دونوں ممالک کی ترقی اور خوشحالی کیلئے آپکے ساتھ ملکر کام کرنے کے خواہشمند ہیں تاکہ دونوں ممالک کی سدا بہار دوستی ترقی کرتی رہے۔صدر مملکت نے چین کے صدر ڈی جن پنگ کا شکریہ ادا کیا اور کہا دونوں ملک عوام کی خوشحالی کیلئے ایک دوسرے سے تعاون کرتے رہیں گے۔ پاک چین دوستی دنیا کیلئے مثالی حیثیت رکھتی ہے۔
چین/ پیغام