کراچی(آئی این پی) قومی کرکٹ ٹیم کے کپتان اظہر علی نے کہا ہے کہ میچ کے دوران پریشر نہیں لیا، بھروسہ تھا کہ اچھا کھیل کر فتح اپنے نام کریں گے۔تفصیلات کے مطابق سری لنکا کے خلاف ٹیسٹ سیریز اپنے نام کرنے کے بعد کومنٹیٹر سے گفتگو کرتے اظہر علی کا کہنا تھا کہ سنچری بنا کر بہت اچھا لگا، ہمیں اس جیت کی بہت ضرورت تھی، سری لنکا کی ٹیم کا بھی بیحدشکر گزار ہوں۔انہوں نے یہ بھی کہا کہ میچ کے دوران ڈریسنگ روم کا ماحول بہت اچھا تھا۔دوسری جانب گورنرپنجاب چوہدری محمد سرور نے سری لنکا کے خلاف ٹیسٹ سیریز جیتے پر قومی ٹیم کو مبارکباد پیش کی، ان کا کہنا تھا کہ قومی ٹیم نے زبردست کھیل کا مظاہرہ کیا، 13 سال بعد ہوم گرانڈ پر ٹیسٹ سیریز میں فتح تاریخی ہے۔انہوں نے یہ بھی کہا کہ نوجوان کھلاڑی عابدعلی اور شان مسعود نے جیت میں اہم کردار ادا کیا، سری لنکا کی ٹیم اور مینجمنٹ کے پاکستان آنے پر شکر گزار ہیں۔ جبکہ کرکٹ کے مداحوں کی جانب سے بھی ٹیم کو مبارکباد پیش کی جارہی ہے۔