عمران خان نواز، شہباز شریف کے منصوبوں پر تختیاں لگا رہے ہیں: حنا پرویز بٹ 

لاہور(لیڈی رپورٹر)مسلم لیگ(ن) کی رکن پنجاب اسمبلی حناپرویز بٹ نے کہا ہے کہ عمران خان ساڑھے تین سال سے صرف نواز،شہباز کے منصوبوں پر تختیاں لگارہے ہیں۔عمران خان کا ویژن ہی افتتاح پر افتتاح کرنا اور تختی پر تختی لگانا ہے۔نوازشریف اور شہبازشریف کے منصوبوں پر تختیاں لگاتے لگاتے عمران خان تھک جائیں گے لیکن ہمارے منصوبے ختم نہیں ہونگے۔جس لیڈر کے پاس نہ ویژن،نہ ایجنڈا اور نہ حکمت عملی ہو وہ ملک کی تقدیر کیا بدلے گا۔ایک وقت تھا پاکستان میں اربوں ڈالر کی سرمایہ کاری آرہی تھی تو قوم خوشیاں منارہی تھی ۔چین جیسے دوست ملک نے مشکل وقت میں پاکستان کا ساتھ دیا اور پاکستانیوں کو سی پیک کا تحفہ دیا لیکن بدقسمتی سے آج سی پیک بری طرح رول بیک ہو چکا ہے ۔کوئی حکومتی وزیر سی پیک پر بات کرنے کو تیار نہیں ہے۔انہوں نے مزید کہا عمران خان دنیا کا مقبول ترین لیڈر بننے کے جھوٹے دعوے کرکے شاید تھکتے نہیں ہیں۔مقبول لیڈر وہی ہوتا ہے جس کی عوام،پارلیمنٹ اور کابینہ میں عزت ہو لیکن ان تینوں جگہوں میں عمران خان کو ایک کٹھ پتلی سے زیادہ عزت نہیں ملتی۔