پرویز الہٰی کو ”میٹرو بس فوبیا“ ہو گیا: عابد شیر علی

لاہور (خصوصی رپورٹر) رکن قومی اسمبلی عابد شیر علی نے کہا کہ پنجاب حکومت کا میٹرو بس پراجیکٹ پرویزالہٰی کی آنکھ میں کانٹے کی طرح چبھ رہا ہے۔ پاکستان بھر میں ہر کوئی میٹرو بس پراجیکٹ کی افادیت کا معترف ہے صرف پرویزالہٰی کو ہی عوام کو بہترین سفری سہولیات فراہم کرنے والے اس منصوبے سے تکلیف پہنچ رہی ہے۔ پرویزالہٰی کو ”میٹرو بس فوبیا“ ہوگیا مگر وہ جتنا مرضی شور مچا لیں انتخابات میں (ق)لیگ کا مکمل صفایا ہوجائے گا۔ انہوں نے کہا کہ پرویزالہٰی دور میں شروع کئے جانے والے منصوبے کرپشن، کمیشن خوری اور اقربا پروری کی بدترین مثال تھے۔ اس دور میں پنجاب کے وسائل پر ڈاکہ ڈالا گیا اور اربوں روپے کی کرپشن کے ذریعے صرف اپنی جیبیں بھری گئیں۔