سینٹ کی قائمہ کمیٹی برائے بین الصوبائی رابطہ کا اجلاس سینیٹر مشاہد اللہ کی زیرصدارت ہوا۔ چیئرمین پی سی بی شہریار خان نے سینٹ کمیٹی کو بریفنگ میں بتایا کہ میچ فکسنگ پوری دنیا میں ہوتی ہے جہاں ٹی 20 میچز ہوتے ہیں وہاں بھی بکی آ جاتے ہیں۔ بھارت، بنگلہ دیش اور سری لنکا میں بھی بکی آ جاتے ہیں۔ پہلا پی ایس ایل کامیاب ہوا تو دوسرے میں بکی آ گئے۔ بکی کھلاڑیوں سے براہِ راست رابطہ نہیں کرتے۔ بکی رشتہ داروں یا سابقہ کھلاڑیوں کے ذریعے رابطہ کرتے ہیں۔ یوسف کا ناصر جمشید سے رابطہ ہوا، دونوں لندن سے دبئی آئے۔ ناصر جمشید نے کھلاڑیوں سے کہا یہ شخص آپ سے ملنا چاہتا ہے۔ ناصر جمشید نے تین کھلاڑیوں خالد لطیف، شرجیل اور عرفان کو یوسف سے ملوایا۔ پی سی بی کے اینٹی کرپشن یونٹ کو علم تھا کہ ایسا ہونے والا ہے۔ کھلاڑیوں کو باقاعدگی سے لیکچر دئیے جاتے ہیں۔ ہم نے آئی سی سی سے رابطہ کیا۔ مشاہداللہ نے دریافت کیا کہ آئی سی سی نے آپ سے رابطہ کیا کہ آپ نے ان سے رابطہ کیا۔ اگر آپ نے رابطہ کیا تھا تو آپ کو خبروں کی تردید کرنی چاہئے تھی۔ پی سی بی چیئرمین نے کہا کہ ہمارے پاس یہ اطلاع تھی کہ ایسا واقعہ ہونے والا ہے اس لئے تیار تھے۔ شرجیل خان اور خالد لطیف کو چارج شیٹ دی ہے۔ کھلاڑیوں کو مستقل طور پر اردو اور انگریزی زبان میں بریفنگ دی جاتی ہے۔ کھلاڑیوں نے اقرار کیا ہے کہ انہوں نے بورڈ کو نہیں بتایا کہ بکی سے بات ہوئی ہے۔ ہم نے کھلاڑیوں کو 14 دن کا موقع دیا کہ وہ اصل صورتحال سے آگاہ کریں۔ سٹے بازی سے بچنے کیلئے ہر کھلاڑی کو پہلے سے بریفنگ دی۔ کھلاڑیوں کا آفیشل بیان پہلے بیان سے تھوڑا مختلف ہے۔ ہمارے اینٹی کرپشن یونٹ کے چیئرمین کرنل اعظم نے کھلاڑیوں سے سوال کئے۔ پی سی بی چیئرمین شہریار خان نے میڈیا سے بات کرتے ہوئے کہا اِدھر اُدھر کے بیانات کی کوئی اہمیت نہیں۔ مصباح کو کھیل جاری رکھنا ہے تو مجھے بتائیں۔ کھلاڑیوں سے پوچھا کہ بکی سے ان کا کیا معاملہ ہوا، سپاٹ فکسنگ کا کیا طے ہوا۔ خالد لطیف اور شرجیل خان نے کہا کہ ہم سے غلطی ہوئی محمد عرفان کیلئے سے تحقیقات ابھی چل رہی ہیں جو شواہد ملے ان سے لگا کہ شرجیل نے بکی سے بات پر میچ میں پیشرفت کی۔ خالد لطیف نے اس دن میچ نہیں کھیلا لیکن اس نے رضامندی کا اظہار کیا تھا۔ عرفان سے بکی نے بات کی لیکن اس نے ایک کان سے سُن کر دوسرے کان سے نکال دیا لیکن عرفان نے سکیورٹی آفیشلز کورس کی اطلاع نہیں دی۔