لاہور(سپورٹس رپورٹر)آسٹریلیا کرکٹ ٹیم کے عبوری کوچ اینڈریو میکڈونلڈ کا کہنا ہے کہ پاکستان کے پاس بہت اچھے فاسٹ بائولرز ہیں، شاہین آفریدی بہت بہتر ہورہے ہیں، ہمارے پاس بھی اچھے فاسٹ بائولرز ہیں، دونوں ٹیموں کے مابین اچھا مقابلہ ہو گا۔دورہ پاکستان سے قبل غیرملکی میڈیا سے گفتگو کرتے ہوئے اینڈریو میکڈانلڈ نے کہا کہ پاکستان روانگی سے قبل ہم نے تمام پلانز پر اپنا کام مکمل کیا ہے، پاکستان سپر لیگ کے میچز دیکھ رہے ہیں ان سے بھی بہت معلومات مل رہی ہیں۔ ہم نے بنیادی چیزوں پر کام مکمل کیا ہے، ٹرننگ پچز اور گھاس والی پچز بھی ذہن میں ہیں، ہمارا سکواڈ متوازن ہے، کنڈیشنر کے مطابق ہمارے پاس آپشنز ہیں۔ پاکستان میں کیمرون گرین پر بائولنگ کا پریشر بڑھ سکتا ہے جبکہ ڈیوڈ وارنر کیساتھ عثمان خواجہ ٹاپ آرڈر میں بیٹنگ کریں گے۔ یہ کہنا مشکل ہے کہ پاکستان ٹیم پاکستان میں کھیلتے ہوئے مختلف ہوگی یا یو اے ای میں کھیلنے والی پاکستان ٹیم ہوگی۔ پاکستان ٹیم کے بارے میں پیش گوئی نہیں کی جاتی لیکن اس وقت یہ اپنی کنڈیشنر میں کھیل رہی ہے، یہ بات سب کو پتہ ہے کہ آسٹریلوی ٹیم برصغیر میں مشکلات کا سامنا کرتی ہے۔