کراچی پولیس حملہ: دہشت گردوں کے زیراستعمال گاڑی کا فارنزک مکمل

کراچی(اسٹاف رپورٹر)کراچی پولیس آفس پر حملہ کرنے والے دہشت گردوں کے زیر استعمال گاڑی کے فارنزک میں حملہ آوروں کے پانچ فنگرپرنٹس حاصل کرلئے گئے ہیں۔کراچی پولیس آفس حملے کی تحقیقات جاری ہیں، تحقیقاتی ذرائع کے مطابق دہشت گردوں کے زیراستعمال گاڑی کا فارنزک مکمل کرلیا گیا ہے۔تحقیقاتی ذرائع نے بتایا کہ گاڑی کے فارنزک میں حملہ آوروں کے پانچ فنگرپرنٹس حاصل کیے گئے ہیں، جو نادرا ریکارڈ سے چیک کیے جارہے ہیں۔ذرائع کے مطابق دہشت گردوں کی گاڑی سے حملہ آوروں کے جوتے، ٹوپی اور اجرک ملی ہے، جب کہ گاڑی میں رسی، چٹائی، رضائی، موزے اور کلاشنکوف کے میگزین بھی تھے۔ گاڑی میں پلاسٹک کی بوری،رومال بھی تھا۔تحقیقاتی ذرائع نے بتایا کہ گاڑی کے اصل مالک کا تاحال سراغ نہیں لگایا جا سکا، جب کہ حملے میں مارے گئے تیسرے دہشتگرد کی تاحال شناخت بھی نہ ہوسکی۔ تیسرے دہشت گرد کے فنگرپرنٹس نادرا ریکارڈ سے میچ نہ ہوسکے۔