نظریہ پاکستان ٹرسٹ کے زیراہتمام دو روزہ سیرت النبیؐ کانفرنس ختم، ایوان کارکنان کو دلہن کی مانند سجایا گیا

لاہور (خصوصی رپورٹر) نظریۂ پاکستان ٹرسٹ کے زیر اہتمام دو روزہ سیرت النبی ﷺ کانفرنس بخیر و خوبی اختتام پذیر ہو گئی۔ اس موقع پر ایوان کارکنان تحریک پاکستان لاہور کو روضۂ رسول پاک ﷺ کی دل آویز تصاویر پر مشتمل بینرز اور احادیث مبارکہ پر مبنی سٹیمرز سے دلہن کی مانند سجایا گیا تھا۔ وائیں ہال جہاں یہ کانفرنس منعقد ہوئی‘ اس کا دلکش بیک ڈراپ بھی  اپنی مثال آپ تھا۔ نظریۂ پاکستان ٹرسٹ کے سیکرٹری شاہد رشید نے کانفرنس کی اختتامی نشست میں شرکاء کو آگاہ کیا  اس ضمن میں ٹرسٹ کو شیزان انٹرنیشنل کا بھرپور تعاون حاصل رہا ہے۔ کانفرنس کے دونوں دن اور عشرۂ جشن عید میلادالنبیؐ کے سلسلے میں منعقدہ دیگر تمام تقریبات میں شرکاء کی تواضع کیلئے ان کی طرف سے جوس کے پیکٹ فراہم کئے گئے اور بینر سٹیمرز سپانسر کیے گئے۔ انہوں نے کانفرنس میں موجود شیزان انٹرنیشنل کے ڈائریکٹر وسیم اے محمود کا بطور خاص شکریہ ادا کرتے ہوئے کہا کہ ان کا یہ تعاون انتہائی قابل قدر ہے۔