وزیراعظم وطن واپس پہنچ گئے‘ آج ملتان میں میٹروبس سروس کا افتتاح کرینگے

اسلام آباد+ملتان(نوائے وقت رپورٹ+نیوز ایجنسیاں) وزیراعظم نوازشریف وطن واپس پہنچ گئے وزیراعظم عالمی اقتصادی فورم میں شرکت کیلئے سوئٹزرلینڈ گئے تھے جبکہ انہوں نے واپسی پر لندن میں قیام کیا۔ علاوہ ازیں وزیراعظم نوازشریف آج ملتان میں میٹروبس سروس کا باقاعدہ افتتاح کریں گے۔ وزیراعظم میاں محمد نواز شریف کے ہمراہ وزیراعلیٰ پنجاب محمد شہباز شریف بھی ہونگے۔ افتتاح کے بعد شہری جدید بس سروس کی سہولت حاصل کر سکیں گے۔ یہ منصوبہ مئی 2015ء میں شروع کیا گیا تھا۔منصوبے پر 28ارب اور88کروڑ روپے کی لاگت آئی ہے۔افتتاحی تقریب کے سلسلے میں تمام تیاریاں وانتظامات مکمل کرلئے گئے ہیں۔افتتاحی تقریب میں غیرملکی سفیروں سمیت 1500مہمانوں کو مدعو کیا گیا ہے۔افتتاحی تقریب میں سینئرسیاستدان مخدوم جاویدہاشمی ،سابق وزیراعظم یوسف رضاگیلانی سمیت جنوبی پنجاب کی اہم سیاسی شخصیات کی شرکت بھی متوقع ہے۔وزیراعظم اوردیگرغیرملکی مہمانوں کی آمد کے پیش نظرپنجاب کے دیگر اضلاع سے بھی پولیس کی بھاری نفری بلائی گئی ہے۔وزیراعظم بہائوالدین زکریا یونیورسٹی کے جناح آڈیٹوریم میں منعقد ہ افتتاحی تقریب کے شرکاء سے خطاب کریں گے۔ میٹروبس حکام کے مطابق افتتاح کے 2گھنٹے بعدمیٹروبس سروس شہریوں کیلئے کھول دی جائے گی۔