مستونگ : پاک فضائیہ کا تربیتی طیارہ فنی خرابی کے باعث گر کر تباہ‘ پائلٹ شہید

مستونگ(این این آئی+ آن لائن) ضلع مستونگ کے علاقے کھڈ کوچہ میں پاک فضائیہ کا ایک طیارہ گر کر تباہ ہونے سے پائلٹ شہید ہوگیا۔ ترجمان پاک فضائیہ کے مطابق ایف سیون پی جی معمول کی تربیتی پرواز پر تھا کہ مستونگ کے قریب گر کر تباہ ہوگیا۔ ترجمان کے مطابق اس اندوہناک واقعہ میں طیارے کے پائلٹ لیفٹیننٹ طاہر نے جام شہادت نوش کیا۔ ترجمان پاک فضائیہ کے مطابق حادثے کی وجوہات جاننے کے لیے ایئر ہیڈکوارٹرز میں ایک بورڈ آف انکوائری تشکیل دے دیا گیا اس سے قبل حادثے کی اطلاع ملتے ہی امدادی ٹیمیں جائے وقوع پر پہنچ گئی تھیں۔ڈپٹی کمشنر مستونگ ممتاز کھیتران کے مطابق کھڈ کوچہ کے علاقے سے ایک پیرا شوٹ بھی ملا ہے۔ ڈپٹی کمشنر مستونگ ممتاز کھیتران کے مطابق پاکستان ائر فورس کا طیارہ فنی خرابی کے باعث گرا ہے۔
طیارہ/ تباہ