ٹمبر مارکیٹ ‘ نوجوان کاریگر کی لاش چوبارے سے برآمد

ملتان(کرائم رپورٹر )ٹمبر مارکیٹ میں25 سالہ نوجوان کاریگر کو قتل کر دیا گیا۔لاش رہائشی چوبارے سے برآمد۔تفصیل کے مطابق تھانہ قطب پور کے علاقے ٹمبر مارکیٹ میں ایاز بھٹہ کی دکان میں چنیوٹ کا رہائشی 25 سالہ نوجوان بلال کام کرتا تھا۔جو دکان کے اوپر ہی چوبارے پر رہتا تھا۔گزشتہ روز ایاز بھٹہ اپنی دکان پر آیا تو بلال کو بلانے چوبارے پر گیا تو وہاں اس کی لاش خون میں لت پت پڑی تھی اور اس کے سر اور جسم کے مختلف حصوں پر تشدد کے نشانات اور کمرے میں مزاحمت کے آثار تھے۔اطلاع ملنے پرپولیس موقع پر پہنچ گئی۔ایاز بھٹہ دکان مالک کے مطابق بلال اس  کے پاس 7 سال سے کام کر رہا تھا۔اس کی زیادہ کسی سے دوستی نہیں تھی۔جمعرات کی شام وہ بلال کو دیگر کاریگروں کو دینے کے لئے 12 ہزار روپے دے کر چلا گیا۔اس نے کاریگروں کو جمعرات کے پیسے دئے۔جمعہ کو دکان بند تھی۔ہفتہ کو آ کر دیکھا تو بلال مردہ حالت میں پایا گیا۔اس کی 125 ہنڈا موٹرسائیکل بھی موجود نہیں ہے۔پولیس نے لاش پوسٹ مارٹم کرانے کے لئے نشتر ہسپتال کے سرد خانہ منتقل کر دی۔پولیس کے مطابق لاش اکڑی ہوئی اور 24 گھنٹے پرانی ہے۔قیاس ہے کہ بلال کو جمعرات اور جمعہ کی درمیانی شب قتل کیا گیا۔