بریک ڈاؤن، راولپنڈی،کینٹ کے علاقوں میں معمولات زندگی مفلوج

راولپنڈی(اپنے سٹاف رپورٹر سے)بجلی کے طویل ترین بریک ڈاؤن سے راولپنڈی شہر اور کینٹ کے علاقوں میں معمولات زندگی مفلوج ہو کر رہ گئے علی الصبح سے شروع ہونے والا بجلی کا بریک ڈان طویل ترین شکل اختیار کر گیا شام ہوتے ہی گلیوں بازاروں میں سناٹا چھا گیا بجلی کی بندش کے باعث کاروباری مراکز،نجی ہسپتال اور کلینک شدید متاثر ہوئے سرکاری و نجی دفاتر میں بھی بجلی کے بریک ڈان کے باعث معمولات متاثر ہوئے جن عمارتوں میں جنریٹر اور و پی ایس چل رہے تھے وہ بھی رفتہ رفتہ بند ہوگئے گھروں، ہوٹلوں میں واسا اور کنٹونمنٹ بورڈ کی واٹر سپلائی بھی بری طرح متاثر ہوئی گھروں کی ٹینکوں میں پانی نہ بھرے جانے سے خواتین شدید مشکلات سے دوچار ہوئیں موبائل فونز کی چارجنگ نہ ہونے سے بھی لوگوں کو مشکلات درپیش رہیں۔