لاہور(سپورٹس رپورٹر)شیر پنجاب کا ٹائٹل گوجرانوالا کے عدنان پہلوان ٹائراں والا نے جیت لیا، اعزاز کیلئے ہونے والی کشتی میں لاہور کے طاری پہلوان مات کھا گئے۔شیر پنجاب دنگل میں20 چھوٹے بڑے مقابلے بھی ہوئے ، پہلوانوں کی روائتی سلامی پیش کی ، گلوگاروں نے سماں باندھ دیا۔لاہور میں شیر پنجاب دنگل کا جوڑہوا،ڈھول کی تھا پ پر پہلوانوں کی بیٹھکیںاور پھر روائتی سلامی ،دنگل دیکھنے کے لیے شائقین کی بڑی تعداد پنجاب سٹیڈیم پہنچی ،مقابلے میں کم سن پہلوانوں نے بھی خوب داو پیچ دکھائے۔دنگل کے دوران روایت سے ہٹ کر موسیقی کا بھی اہتما م کیا گیا ،جس میں سابق پہلوانوں نے بھی رقص کر کے خوب سماں باندھا۔ٹائٹل فائٹ کیلئے لاہور کے طاری پہلوان اور گوجرانوالاکے عدنان پہلوان ٹائراں والا اکھاڑے میں اترے ، 26 منٹ تک دونوں پہلوان ایک دوسرے کو چت کرنے کوشش کرتے رہے۔بالاخر عدنان پہلوان نے طاری پہلوان کو ہراکر شیر پنجاب ٹائٹل لے اڑے۔منتظمین نے شیر لاہور اور شیر پنجاب کی کامیابی کے بعد ملکی سطح پر جوڑ کرانے کا اعلان کیا ہے۔