لاہور(سپورٹس رپورٹر+ نمائندہ سپورٹس )محمد وحید کی شاندار اور ریکارڈ ڈبل ہیٹ ٹرک کی بدولت نیشنل چیلنج کپ فٹ بال میں پہلی بار شرکت کرنے والی سول ایوی ایشن اتھارٹی نے ریلویز کو 6-0 سے شکست دیدی۔ یہ ایونٹ کی واحد ڈبل ہیٹ ٹرک ہے۔ دوسرے میچ میں محمد جمیل کے 90ویں منٹ میں کئے گئے فیصلہ کن گول کی بدولت دو بار نیشنل چیلنج کپ کی فاتح آرمی نے پی ایف ایف ٹائیگر کو سنسنی خیز مقابلے کے بعد 1-0 سے زیر کیا۔محمد وحید کا کہنا تھا کہ15 روزہ تربیتی کیمپ میں ہیڈ کوچ صدیق شیخ کی زیرنگرانی ہم نے بھرپور تیاری کی اور اسی کا نتیجہ ہے کہ ہماری ٹیم نے سابق نیشنل چیمپئن ریلویز کو آوٹ کلاس کیا۔ مجھے اپنی عمدہ کارکردگی پر بے حد خوشی ہے اور یہ ریکارڈ میں اپنے والدین اور ہیڈ کوچ صدیق شیخ کے نام کرتا ہوں۔ انشاء اللہ اپنی اس کارکردگی کو ایونٹ کے دیگر میچوں میں بھی دہرانے کی کوشش کروں گا۔