مختلف واقعات‘  دیرینہ دشمنی پر مخالفین کی فائرنگ‘ نوجوان ‘ زمیندار قتل 

حافظ آباد+ نوشہرہ ورکاں ( نمائندہ نوائے وقت+ نامہ نگار) مختلف واقعات میں دیرینہ دشمنی پر فائرنگ سے نوجوان اور زمیندار کو قتل کر دیا گیا ۔ تفصیلات کے مطابق احسان الحق کی اپنے مخالفین سے سابقہ دشمنی چلی آرہی تھی جس پرگزشتہ روز جب وہ اسد اﷲپور سے ونیکے تارڑ آرہا تھا تو راستہ میں گھات لگائے مخالفین نے فائرنگ کردی جس کے نتیجہ میں وہ شدید زخمی ہوگیا اسے ٹراما سنٹر لایا گیا جہاں وہ زخموں کی تاب نہ لاتے ہوئے دم توڑ گیا۔ علاوہ ازیں ڈیرہ بدر دین بشمولہ ٹھٹہ مانک میں دیرینہ دشمنی پر عرفان کو مخالفین نے فائرنگ قتل کردیا پولیس ذرائع کے مطابق ملزم ریاست، خالد، صابر، جبردین وغیرہ دس نامزد اور پانچ نامعلوم افراد نے عرفان پر فائرنگ کی اور وہ زخموں کی تاب نہ لاتے ہوئے ہسپتال پہنچنے سے قبل ہی جاں بحق ہوگیا مقتول عرفان کیخلاف دو روز قبل مقامی تھانہ میں عبدالوحید کو کلہاڑی سے زخمی کرنے کا مقدمہ درج ہوا تھا جبکہ مقتول کا چچاادریس بھی دوسال قبل مخالفین کی فائرنگ سے قتل ہوا تھا۔