مبینہ مقابلے: شیخوپورہ‘ جڑانوالہ‘ گگو اور منڈی بہاء الدین میں 5 ملزم ہلاک

شیخوپورہ+ جڑانوالہ+ گگو منڈی+ منڈی بہاء الدین (نمائندگان) مبینہ پولیس مقابلوں کے دوران 5 ملزم اپنے ہی ساتھیوں کی فائرنگ سے ہلاک ہو گئے۔  شیخوپورہ کے علاقہ خانپور کلہ نالہ ڈیک کے قریب پٹرولنگ پولیس خان پور اور ڈاکوئوں کے درمیان فائرنگ کے نتیجہ میں ایک ڈاکو ہلاک ہوا جبکہ دو فرار ہوگئے۔ جڑانوالہ میں بچیانہ روڈ پر چک 658 گ ب کے قریب فیکٹری ورکرز کو لے جانے والی بس کی ٹکر سے موٹر سائیکل سوار عظیم ساکن اسلام پورہ ہلاک ہو گیا جو کئی وارداتوں میں ملوث تھا۔ تھانہ گگو منڈی میں چوری کے شبہ میں زیرحراست ملزم مراتب علی ملک ساکن 255۔ای بی پولیس کے تشدد سے ہلاک ہوگیا۔ متوفی مراتب علی 4 سالہ بیٹے اور پندرہ دن کی بیٹی کا باپ تھا۔ متوفی مراتب علی کی نعش ہسپتال پہنچنے پر اس کے ورثاء نے شدید احتجاج کرتے ہوئے وزیراعلیٰ پنجاب سے نوٹس لینے کا مطالبہ کیا۔ منڈی بہاؤالدین کے تھانہ گوجرہ کے علاقہ چک 43 کے قریب ملزم  نے  پولیس پارٹی پر فائرنگ کی جس سے ایس ایچ او گوجرہ سب انسپکٹر عابد رسول زخمی ہو گئے۔ اس دوران دو ملزم ہلاک ہوگئے جن کی شناخت رضوان اور عامر کے نام سے ہوئی۔