آزاد کشمیرکی وادی کیل میں انتخابی جسلہ عام سے خطاب سے کرتے ہوئے وزیراعظم سید یوسف رضا گیلانی نے کہا کہ بڑے سے بڑے مسائل کومذاکرات کی میزپربیٹھ کرحل کیا جاسکتا ہے، پانچ فروری کو یوم کشمیر منانے کا آغازاورمنسقم خاندانوں کو ملانے کے لئے کنٹرول آف لائن پر نئے راستے کھولنے کا اعلان ان کی لیڈر محترمہ بے نظیر بھٹو نے ہی کیا تھا۔
وزیراعظم سید یوسف رضا گیلانی کا کہنا تھا کہ سیاسی مخالفین قومی مفاد سے ہٹ کرذاتی مفاد کی بات کررہے ہیں۔ ہم پراداروں کا احترام نہ کرنے کا الزام لگایا جاتا ہے جوبے بنیاد ہے۔ ان کا کہنا تھا کہ انیس سو تہتر کا آئین اس بات کی گواہی ہے کہ پیپلزپارٹی جتنا اداروں کا احترام کرتی ہے اتنی کوئی اور پارٹی نہیں کرتی۔ وزیراعظم نے واضح کیا کہ پیپلزپارٹی ایک نظریے کا نام ہے اور بے نظیر بھٹو کے قتل کے بعد پارٹی ختم ہونے کی پیش گوئی کرنے والوں کو منہ کی کھانا پڑی ہے۔